Rinnaa Intlansiakna

Hebrai 12:1-2 Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u.

Hebrai ziaktu hian ringtu nun leh intlansiak hi a tehkhin fo a, lawmman dawng tura hmalam pan tul a nihna hian tehkhin pawh a awlsam phah hmel viau mai a, mahse; inan lohna chu an nei ve nual tho mai, intlansiaknaah chuan a thleng hmasa ber ber te kha lawmman dawngtu tur chu an nih mai laiin, ringtu nunah erawh a tawp thlenga tlan peih apiangten lawmman kan dawng dawn thung a ni, amaherawhchu Pathian thu leh tehkhin thu hi chu 100% in a inang diak diak vek thei lo a, chuvangin a tehkhin chhanin a thu tum ber hi kan sawi dawn a ni.

Ringtu nun hi intlansiakna ang maia hahthlak a nih chang a tama, Kan lawmman tur Nunna Lal lukhum dawng tur chuan a tawp thlenga tlan ngei a ngai si, hrehawm leh hahthlak chunga tlan chhunzawm zel thei ni tur chuan, loh theih lohin chhel a lo ngaia, chu tak chu a ni, a harsa lai ber leh mi tam tak tlan thlen theih loh chhan chu, mahse, vawiina kan sawi tur thil hrehawm leh hahthlak hi chu Tirhkoh te tuar ang kha a ni ve lo a, anmahni anga Isua ringtu nih avanga tih duh dahna kan tuar ve loh avangin kan hrehawm tih hi a inang tawh lo a ni, min tihnawktu an tam lutuk a, kan zalenin kan duhna lam lam kan hawi kualin kan phar vel thei a, mahse chutiang ringawt chuan nunna lal lukhum a hmuh theih si loh avangin, hmu thei tur chuan chutianga min tihnawktu leh sual keimahnia bet tlat chu kan dah that a ngai, chu thilah tak chuan a ni keini tan chhel a tul em em chhan chu. Hebrai 10:36

 (Pathian duhzawng in tih hnuin thiltiam chu in hmuh theih nan chhelna in ngai asin.)

Min tihnawktu chu eng Nge?

Tirhkoh Paula'n Timothea hnena a sawi II Timothea 4:4-5 "an bengte chu thutak lamah an chhungawng ang a, thawnthu lam panin an peng tawh ang. 

Nang erawh chu engkimah fimkhur la, hrehawm tuar la, Chanchin Tha hriltu lam hna thawk la, i rawngbawlna kha hlen rawh." a tih kha kan tunlai khawvelah pawh hian kan tawng ve mek a, Youtube-ah te Sermon tha tak tak awlsam taka ngaihthlak mai tur a awm laiin kan mit duh zawng leh kan beng duh zawng eng eng emaw, mi thawnthu phuah chawp mai mai leh movie recap tih ang reng te hian tunlai mi tam zawk a hip tawh a, kan beng chu thutak lamah chhut ngawnin a awm phah thin, mahse, hetiang min tihnawktu chi hrang hrang te hi keini hunah chauh ni lo, Tirhkohte rawngbawl lai hun atang daih tawh khan khan a lo awm ve teuh tawh a, a hun laia mite mil zelin kan rinna lak ata min hruai hrang thei thil hi a lo awm ve zel a ni, chutiang zawng zawng chu sual an va ni vek kher lo a, Rom 14:14-ah

"Amah ngawtah chuan thiang lo engmah reng a awm lo tih Lalpa Isuaah chuan ka hre em em mai, englo thiang lova ngaitu tan erawh chuan amah atan chuan a thiang lo a ni." A lo tih angin amah ngau ngau chuan min tihnawktu thil hrang hrangte hi sual leh tih thiang lo an ni hran lo a, Kan rinna min tih-dal sak thei khawpa Pathian thu aia kan ngaihvenna leh kan beng te thutak lama kan chhut ngawn phah thin avang chiah hian a ni kan tan Sual a nih thin ni, ti lo tura inkhap emaw inzirtir chi a ni hran lo a, mahse Lal Isua min hlattirtu a nih dawn ai chuan tih loh tawp kha a tha ber awm e.

Min tihnawktu hian min tichak lo.

He'ng Internet lam thil hi tun lai thalaite tana tangkai leh hnawksak ber a nih avangin sawi zui deuh bik ta ila, a tha zawnga kan hman thiam chuan thil tangkai lutuk a nih rualin Pathian mamawh lo khawpa min awm tleitu atana kan hman fo hian Rinnaa kan intlansiaknaah min tihnawktu an lo ni thin a, min tichak lo a, min tluktirin, kan tlan lai min chelh ding thin, chu chu Tirhkoh Paula khan a hriat chian em avangin Temothea hnenah pawh a chah uluk hle a nih kha.

Engmah lo mai

Keini thalaite rilru-ah hi chuan thih hnu piah lam thil hi a la lang lian vak lo tlangpui a, thi mai thei leh la thi vek tur tho kan ni tih inhre kur mah ila, chu chuan kan rilru-ah hmun a chang tam teh chiam lo, Chutiang chu kan nih dan tlangpui anih avangin chatuan nunna Kan chang thei ang em tih lam hi kan enghelh ngai meuh lo, nuam kan tih zawng leh kan duhna lam lamah kan la tal kual vel mai mai thin a ni. Mahse chu tak chu nakin huna kan tan a la pawi em em dawn, kan nuam tih zawng, Kan hlimna tur atana kan thlan thil chi hrang hrang te hi kan vui liam a, Rinnaa intlansiakna thaah chuan kan tlan ve hram hram a ngai a ni. A chhan chu kan dam chhung kum te hi a tawiin kan hringnun hi a ho lutuk, Israel lal Solomona khan a duh duh neia, lal dang zawng zawng aia hosa leh fing a nih hnu khan a a hringnun a han thlir let a, a thil neih engkim mai leh amah ngei pawh kha kum hlun lo tur, ral leh mai tur vek a nihzia a han hmuh chian khan, engmah lo mai mai a ni" a ti fai vek mai a ni. (Thuhriltu 2:11

Tichuan, ka kut chhuak zawng zawngte leh ka thawhrimnaa ka thiltih zawng zawngte ka han en hian, ngai teh, thil zawng zawng hi engmah lo leh thil lothlawn mai a lo ni a, ni hnuaiah hian hlawkna rêng rêng alo awm lo ve!)

Chhel a ngai

I Korinth 9:25 (MGB) Tin, intihsiaknaahte chuan a bei talh talh apiang chu engkimah an insum thin a ni." A tih angin, in-fit tak leh a tawp thlenga tlan thei tur chuan min ti tlan chak lo theitu ei leh in te insum a lo ngaia, taima taka insawizawi te a lo ngai thin ang hian, rinnaa kan intlansiaknaah pawh hian a tawp thlenga tlan thei tur chuan kan tisa duh zâwng zawng zawng te kha kan tih vek a rem tawh lo a, intlahdah taka kan nun dan ang anga awm mai lova, Pathian ngaihsak tura kan insawizawi te pawh a lo ngai a ( I Tim 4:7)

He'ng zawng zawng hi thil nuam tak a nih loh avangin chhel a ngai reng a ni, kan nuam tih thin zawng kha a nih loh avangin tih hram hram a ngai a, mi tam takin an tlin thin lo reng a ni.

Dan anga beih

Intihsiakna reng reng hian tih dan tur felfai tak an nei veka, Intlansiaknaah pawh tih dan tur eng eng emaw a awm ve bawk, chutianga dan/ kalphung zawm tur te ngai pawimawh lova tlan ve te chuan lawmman an dawng thei lo va, Intlansiaknaa tel te zingah pawh chhiar tel an ni ngai lo, chutiang bawkin rinnaa kan Intlansiaknaah pawh hian, lawmman hmu tlaka tlan tur chuan Intlansiakte zinga chhiar tel theiha awm ngei turin tlan dan tur dika kan tlan a ngai a, chiang zawka kan sawi chuan, Rin dan tur dika kan rin a ngai a ni.

Rin dan dik/ tlan dan dik

Rin dan dik kan han tih hian rin dan dik tawk lo a awm tih a sawi fiah nghal viauin ka hria, chu rin dan dik chu thiltih nena an thawh dun avanga famkim thei chauh a ni tih kan hmu a, Jakoba 2:22

" Rinna chuan thiltih nen a thawk dun a, tin, thiltih avangin a rinna chu a famkim ta tih i hria e." 

Chu rin dan dik vêk chu Kristian chhuan hmasa ber te rin dan chiah kha a ni reng bawk a ni, Lal Isua thihna, phumna leh a thawhlehna an rin hnuin ama hming ngeiin baptistma an changa, Thlarau thianghlim an dawng bawk, he'ng kan sawi tak rin dan dik Bible a kan hmuh bak rin dan dang te hi Tirhkohte thih hnua an rawn chin chhuah thar a nih avangin a him tawk lo a, hah taka kan tlan hnua lawmman kan dawn thelh loh nan, tlan dan/ rin dan dik Bible a kan hmuh ngei hmang hian intlansiakna thaah chuan i tlan ve ang u.